अपाङ्गता भएको व्यक्तिको ३४ औं अन्तराष्ट्रिय दिवस मनाईयो

१६ मंसिर, हेटौँडा । अपाङ्गता भएको व्यक्तिको ३४ औं अन्तराष्ट्रिय दिवसको अवसरमा हेटौंडामा विविध कार्यक्रम गरिएको छ ।
राष्ट्रिय अपाङ्ग महासंघ बागमती प्रदेशको आयोजनामा रक्तदान कार्यक्रम, सार्वजनिक यातायातमा सचेतनामूलक स्टिकर टाँसका साथै प्रदेश राजधानीका सार्वजनिक स्थान अपाङ्गमैत्री भएनभएको बारेमा डेमो प्रदर्शनी गरिएको थियो । हेटौंडाको बुद्धचोकमा आयोजित रक्तदान कार्यक्रममा ४० जनाले रक्तदान गरेको बागमती प्रदेश अध्यक्ष उपेन्द्र श्रेष्ठले जानकारी दिनुभयो ।
त्यस्तै, सार्वजनिक यातायातमा अपाङ्गता भएका व्यक्ति र ज्येष्ठ नागरिकका लागि राज्यले दिएको सहुलियत कार्यान्वयन गराउन सचेतनामूलक स्टिकर टाँसिएको छ । अपाङ्गता ऐन २०७४ को दफा ३७ को उपदफा २ र ज्येष्ठ नागरिक ऐन २०६३ को दफा ९ को उपदफा २ अनुसार अपाङ्गता भएका व्यक्ति तथा ज्येष्ठ नागरिकले गाडी भाडामा ५० प्रतिशत छुट पाउनुपर्ने व्यवस्था छ ।

यही व्यवस्थाको प्रभावकारी कार्यान्वयनका लागि दुई सय वटा सार्वजनिक यातायात र टिकट काउन्टरमा स्टिकर टाँस गरिएको हो । महासंघले तोकिएबमोजिम भाडा छुट नपाएमा ट्राफिक प्रहरीको हटलाइन १०३ मा सम्पर्क गर्न आग्रह गरेको छ । नारायणी यातायात व्यवसायी संघ र जिल्ला ट्राफिक कार्यालय लगायतको उपस्थितिमा हेटौंडा बसपार्कका सार्वजनिक यातायातमा स्टिकर टाँस्ने कार्य गरिएको महासंघ अध्यक्ष श्रेष्ठले बताउनुभयो । यसैगरी, सार्वजनिक स्थानहरु अपाङ्गता मैत्री भएनभएको बारेमा जानकारी डेमो प्रदर्शनी गरिएको थियो ।
बत्तीको पोल, सडक छेउका रुख र पसलका सामग्रीहरूले गर्दा अपाङ्गता भएका व्यक्तिलाई हिडडुलमा समस्या भएको, अपांगता भएका ग्राहकलाई पसल व्यवसाय लगायतका सार्वनजिक स्थानमा हुने व्यवहारलाई पनि डेमोको रुपमा प्रदर्शन गरिएको थियो । सामाजिक विकास मन्त्रालयका निमित्त सचिव अमृत अधिकारीको प्रमुख उपस्थितिमा डेमो कार्यक्रम गरिएको हो । यसका साथै, महासंघले मंगलबार दिवसको पूर्वसन्ध्यामा दीप प्रज्वलन समेत गरेको थियो । यस वर्ष “अपाङ्गता समावेशी समाजको प्रवद्र्धन, सामाजिक उन्नतिको सम्बद्र्धन” भन्ने नाराका साथ देशभार अन्तर्राष्ट्रिय अपाङ्गता दिवस मनाइएको छ।