बागमती गोल्डकपः साबिक बिजेता चर्च ब्वाईज सर्लाहीसंग स्तब्ध

२० वैशाख, हेटौँडा । मकवानपुरको बागमती गाउँपालिकामा जारी बागमती गोल्डकपमा सर्लाहीको बागमती युथ क्लबले चर्च ब्वाइज युनाइटेड, ललितपुरलाई पराजित गरेको छ ।
आइतबार सहिद स्मृति रंगशालामा भएको खेलमा बागमतीले साविक विजेतासमेत रहेको चर्च ब्वाइजलाई २–१ गोलले हराएको हो ।
चर्च ब्वाइजका लागि सुशन मगरले ११ औँ मिनेटमा गोल गर्दै टोलीलाई अग्रता दिलाएका थिए । बागमतीका लागि अनिष महर्जनले खेलको २८ मिनेटमा र कप्तान आयुष मगरले ८८ औं मिनेटमा पेनाल्टीमार्फत गोल गरे । प्लेयर अफ दि म्याच बागमतीका लागि पहिलो गोल गर्ने महर्जन घोषित भए। उनले १० हजार रुपैयाँ प्राप्त गरे ।
बागमती युथले अब सेमिफाइनलमा फ्रेन्डस क्लब, ललितपुर र प्लानिङ ब्वाइज युनाइटेड, काठमाडौंबीचको विजेतासँग खेल्नेछ । प्रतियोगिताको सेमिफाइनल खेल २३ गते र २४ गते हुनेछ भने फाइनल खेल बैशाख २६ गते हुनेछ ।
प्रतियोगिताको विजेताले १० लाख र उपविजेताले ५ लाख पाउनेछन् । प्रतियोगिताको सर्वोत्कृष्ट खेलाडीले १ लाख १ हजार रुपैयाँ र विधागत उत्कृष्टहरुले २५–२५ हजार रुपैयाँ प्राप्त गर्नेछन् ।