रास्वपाको कार्यकर्ता हिन्दुवादी हुन पाउँछः मनिष झा

१७ साउन, काठमाडौँ । राष्ट्रिय स्वतन्त्र पार्टी (रास्वपा)का नेता तथा सांसद मनिष झाले राष्ट्रिय स्वतन्त्र पार्टीका कार्यकर्ताहरु हिन्दुवादी अभियान्ता हुन पाउने बताउनुभएको छ ।
आईतवार जनकपुरमा पत्रकारहरुसँग कुराकानीका क्रममा उहाँले हिन्दु सम्राट सेनामा रास्वपाको कार्यकर्ता पनि भएको स्वीकार गर्दै यस्तो बताउनुभएको हो । हिन्दु सम्राट सेनाको तर्फवाट सरकारसँग भएको वार्तामा सहभागीमध्ये एक जना रास्वपाका सदस्य रहेका थिए । उक्त विषय सार्वजनिक भएपछि रास्वपाको आलोचना भएको थियो । सांसद झाले यस विषयलाई लिएर अतिरञ्जित गर्न आवश्यक नरहेको बताउनु भयो । पार्टीको सदस्य र धार्मिक आस्थाका आधारमा अभियानमा सहभागी हुनु दुवै व्यक्तिगत स्वतन्त्रताको विषय भएको उहाँको भनाई छ । उहाँले वार्तामा सहभागी भएकै आधारमा विवाद सिर्जना गर्नु अनुचित भएको टिप्पणी गर्नुभयो । उहाँले रास्वपाका पार्टी सदस्य भएको कारणले नै आन्दोलनलाई हिंसात्मक बाटोमा नभई वार्तामार्फत समाधान खोज्न सफल भएको दाबी गर्नुभयो ।
हिन्दु सम्राट सेनाका सम्भावित र उचित मागमाथि थप छलफल गरेर सरकार अगाडी बढ्ने उहाँको भनाई छ । उहाँकाअनुसार हिन्दु सम्राट सेनाका प्रतिनिधिसंग सरकारले साँढे नौ घण्टा वार्ता गरेको थियो । आन्दोलनकारीका मागहरू संवैधानिक, व्यावहारिक र सामाजिक दृष्टिले सम्भव हुने गरी परिमार्जन गर्न लामो समय छलफल गरिएको उहाँको दाबी छ । वार्तामा गृह मन्त्रालय, मधेश प्रदेश सरकार, जनकपुरधाम उपमहानगरपालिका तथा स्थानीय जनप्रतिनिधिहरू सहभागी थिए । आन्दोलनकारीले राखेका मागमध्ये कार्यान्वयनयोग्य र उचित विषयलाई मात्र अघि बढाउन सहमति जुटाउने प्रयास गरिएको सांसद झाले बताउनु भयो ।
सांसद झाकाअनुसार पहिलो चरणको वार्तामा सहभागी हुन नसकेका केही पक्षले असन्तुष्टि जनाएपछि दोस्रो चरणमा थप दुई घण्टा छलफल गरिएको थियो । त्यसक्रममा उनीहरूले थप ६ वटा माग प्रस्तुत गरेका थिए भने केही पुराना माग संशोधनको प्रश्ताव राखेका थिए ।
सुरक्षा निकायका अधिकारी र गृहमन्त्री सुधन गुरुङले आवश्यक आश्वासन दिएपछि उनीहरू सन्तुष्ट भएको सांसद झाको दाबी छ । उहाँले केही राजनीतिक दलले वार्ता सफल नहोस् भन्ने प्रयास गरेको पनि आरोप लगाउनु भयो । तर उनीहरुको प्रयास असफल भएको उहाँको दाबी छ । उहाँले समाजमा अस्थिरता फैलाउने गतिविधिबाट टाढा रहन पनि सबैसंग आग्रह गर्नुभयो । आगो बल्ने वातावरण सिर्जना गर्न खोज्नेहरू स्वयं पनि त्यसको असरबाट अछुतो नरहने उहाँको चेतावनी छ ।