सरकारले आफ्नो क्षमताले भ्याए अनुसार उद्धार र राहतको काम गरेको छः प्रधानमन्त्री ओली

१४ असोज, काठमाडौँ । प्रधानमन्त्री केपी शर्मा ओलीले बाढी, पहिरो र डुबानबाट पीडितहरुको उद्धार, राहत र पुनर्निर्माणको कामलाई सरकारले अझै प्रभावकारी ढंगले अघि बढाउने बताउनुभएको छ ।
अमेरिकाबाट फर्किएपछि आज त्रिभुवन अन्तर्राष्ट्रिय विमानस्थलमा सञ्चारकर्मीहरुले राखेको जिज्ञासाको जवाफ दिने क्रममा उहाँले सरकारले आफ्नो क्षमताले भ्याए अनुसार उद्धार र राहतको काम गरेको उल्लेख गर्दै त्यसलाई अझै प्रभावकारी ढंगले अघि बढाउने प्रतिवद्धता व्यक्त गर्नुभएको हो ।
प्रधानमन्त्री ओलीले सरकारले उद्धार र राहतको काम गर्दागर्दै पनि विरोधका लागि विरोध गर्ने परिपार्टी राम्रो नभएको पनि उल्लेख गर्नुभयो । उहाँले विपद् जस्तो संवेदनशील बेलामा सबैले मिलेर यथार्थपरक ढंगले चल्नु वाञ्छनीय हुने बताउनु भयो । आफूले बाहिर बसेर पनि सो विपद्को सामना गर्नका लागि सम्बन्धित पक्ष र निकायलाई निर्देशन दिने काम गरेको र सरकारले पनि सोही अनुसार काम गरेको प्रधानमन्त्री ओलीको दाबी थियो ।
यसैगरी प्रधानमन्त्री ओलीले आफूले महासभामा भाग लिने क्रममा भारतीय समकक्षी मोदीसँग भेटेको र द्विपक्षीय हितका विविध विषयमा छलफल गरेको पनि जानकारी गराउनुभयो ।
त्यसैगरी जलवायु परिवर्तन लगायतका विश्वस्तरीय समस्या विश्वका सबै राष्ट्रहरु मिलेर समाधान गर्नुपर्ने कुरा पनि राखेको प्रधानमन्त्री ओलीको भनाई थियो । उहाँले जलवायु परिवर्तनको असर निम्त्याउने राष्ट्रहरुले क्षतिपूर्तिका लागि बढी लगानी गर्नुपर्ने कुरालाई पनि आफूले सो महासभामा जोड दिएको बताउनु भयो ।
त्यस अवसरमा परराष्ट्र मन्त्रालयका प्रवक्ता अमृतबहादुर राईले प्रधानमन्त्री ओलीले महासभामा भाग लिने क्रममा गर्नुभएको राष्ट्र प्रमुख तथा सरकार प्रमुखहरुको भेटलगायतका विषयमा जानकारी गराउनुभएको थियो ।